You are here
Home > උණුසුම් පුවත් > ඉන්ධන මිලදී ගැනීමේදී කාඩ්වලින් ගෙවීම භයානකයි

ඉන්ධන මිලදී ගැනීමේදී කාඩ්වලින් ගෙවීම භයානකයි

රටපුරා විවිධ පුද්ගලයන් විසින් වෙළෙඳ ආයතනවලින් භාණ්ඩ මිලදී ගැනීම පිණිස භාවිත කරන බැංකු කාඩ්පත්වලින් ඉන්ධනහල්වලට මුදල් ගෙවීමේදී ඒවායේ දත්ත සොරකම් කර ජාත්‍යන්තර සංවිධානාත්මක සයිබර් අපරාධ කල්ලියකට ලබාදී බැංකු ගිණුම්වල මුදල් ඇදීමේ මහා පරිමාණ ජාවාරමක තොරතුරු ජාත්‍යන්තර සයිබර් අපරාධ මෙහෙයුම් ඒකකය මඟින් සොයාගෙන තිබේ.

විදෙස් රටවල් කිහිපයක සිට ක්‍රියාත්මක වෙන එම අපරාධ කල්ලි ජාලය ශ්‍රී ලංකාවේද සංවිධානාත්මක අපරාධ කල්ලියක් ලෙස ක්‍රියාත්මක වන බව ද අපරාධ පරීක්ෂණ දෙපාර්තමේන්තුව යටතේ ඇති සයිබර් අපරාධ මෙහෙයුම් ඒකකය මඟින් ද අනාවරණය කරගෙන තිබේ.

‍මෙරට පුද්ගලයන් පමණක් නොව ‍බොහෝ රටවල විඩි පිරිසක් ඉන්ධන ලබා ගැනීමේ දී මුදල් ගෙවීමට බැංකු කාඩ්පත් භාවිත කරනු ලබයි. ඉන්ධන හලේදී රථයට ඉන්ධන පුරවන සේවකයා වෙත බැංකු කාඩ් පත දුන් පසු ඔහු ඉන් මුදල් ලබා ගැනීමට යන අතර තුර හොර රහසේ ඉනේ සඟවාගෙන සිටින කුඩා මැෂිමකට කාඩ්පත් ඇතුළුකර එහි දත්ත සොරා ගන්නා බවයි. කාඩ්පත දෙපැත්තේ පමණක් නොව එහි අභ්‍යන්තර රහස්‍ය දත්ත පවා මේ කුඩා මැෂිමේ ගබඩා වෙයි.

මෙරට ඉන්ධනහල්වල සේවකයාට ලබා දුන් මෙවැනි මැෂිමක් මඟින් එම දත්ත සොරකම් කරනු ලැබූවත් වෙනත් රටවල තවත් වෙනත් ක්‍රම ඔස්සේ දත්ත සොරකම් කර ජාත්‍යන්තර සයිබර් අපරාධ ජාවාරම් ජාලය වෙත ලබා දීම සිදු කරනු ලබන බව ද පැවැසේ.

ඉන්ධනහල්වල එම සේවකයන්ට මේ කොන්ත්‍රාත්තුව පවරා දී ඇත්තේ සංවිධානාත්මක අපරාධ කල්ලියක් විසිනි. ඔවුන් ඒ සඳහා මේ සේවකයාට ඔහු බලාපොරොත්තු වනවාටත් වඩා ලොකු මුදලක් ගෙවනු ලබයි. එම කාඩ්පත්වල චල දත්ත වරින් වර එකතු කරන අදාළ සංවිධානාත්මක අපරාධකල්ලිය ඒවා විදෙස් රටවල ඔවුන් සමඟ සම්බන්ධවී ඇති සයිබර් අපරාධ කල්ලිය වෙත සපයනු ලබයි අනතුරුව එම ජාත්‍යන්තර අපරාධ කල්ලිය එම දත්තවලට වෙනත් බැංකු කාඩ්පත් සකස් කර ඒවා උපයෝගී කර ගනිමින් විශාල වශයෙන් බැංකු ගිණුම්වලින් මුදල් ඇදීම සිදු කර ගෙන යන බව ද මෙහිදී සොයා ගෙන ඇත.

මේ ජාවාරම සාමාන්‍යයෙන් මේ වන විට ලෝකයේ රටවල් සියයකට වැඩි ප්‍රමාණයක ක්‍රියාත්මක වන බවත් ඇතැම් පුද්ගලයන්ගේ බැංකු ගිණුම්වල මුදල් විශාල වශයෙන් සොරකම් කිරීම පමණක් නොව ඒවා භාවිත කර තවත් විවිධ මූල්‍ය අපරාධ රැසක් සිදු කර තිබේ. ඉන්ධනහල් හිමියන්ට කුඩා මැෂිමක් ලබා දී දත්ත සොරා ගැනීම ඒටීඑම් කුටිවල සවිකරන ලද මැෂිමක් හරහා දත්ත‍ සොරා ගැනීම ඇතුළු සයිබර් අපරාධකරුවන් විසින් මුදල් සොරකම් කිරීමට අමතරව තවත් සූක්ෂම ක්‍රම භාවිත කරනු ඇතැයි සයිබර් අපරාධ මෙහෙයුම් අංශ විශ්වාස කරයි.

සාමාන්‍යයෙන් ලෝකය පුරා දිනකට රුපියල් වශයෙන් ගතහොත් කෝටි දහසකට වැඩි මුදලක් සයිබර් අපරාධකරුවන් විසින් සොරාගන්නා බව ද පැවැසේ.

ලෝකයේ දැනට ක්‍රියාත්මක වන මත්ද්‍රව්‍ය ව්‍යසනය හා සමානව මේ සයිබර් අපරාධ ද සිදු වන බව සයිබර් අපරාධ මෙහෙයුම් අංශ පවසයි. මේ ජාවාරම කොටු කර ගැනීම පිණිස නොකඩවා මෙහෙයුම් ජාත්‍යන්තරව සංවිධානයවී සිදු කෙරේ. පසුගිය මාස හය තුළ මේ ජාවාරමට සම්බන්ධ දෙස් විදෙස් අපරාධකරුවන් දෙදහසකට වැඩි පිරිසක් ලෝකයේ රටවල් පහළොවකින් පමණ අත්අඩංගුවට ගෙන ඇති බව ද වාර්තා වෙයි.

මේ නිසා ඉන්ධන පිරවීමේ දී බැංකු කාඩ්පත්වලින් මුදල් ගෙවීමට සිදුවන අවස්ථාවල විශේෂයෙන් අවධානය යොමු කළ යුතු බව පෙන්වා දෙන අපරාධ පරීක්ෂණ දෙපාර්තමේන්තුවේ සයිබර් අපරාධ මෙහෙයුම් අංශය ඊට අමතරව වෙනත් ගනු-දෙනුවලදීත් තම බැංකු ගිණුම්වල ශේෂය සහ මුදල් ලබා ගැනීම පිළිබඳව ද දැඩි අවධානයක් යොමු කළ යුතු බව ද දැනුම් දෙයි.

ජාත්‍යන්තර සයිබර් අපරාධකරුවන්ගේ ජාලය මගින් සිදු කෙරෙන සයිබර් අපරාධ සහ මෙරට ඉන්ධන හල් සේවකයන් හරහා සිදු කෙරෙන එම ජාවාරම පිළිබඳ තොරතුර කොළඹ බණ්ඩාරනායක සම්මන්ත්‍රණ ශාලාවේ දී පෙරේදා පැවැති ශ්‍රී ලංකාවේ සංවිධානාත්මක අපරාධ සහ එහි ගෝලීය පැතිකඩ යන වැඩ මුළුවේදී ශ්‍රී ලංකා පරිගණක හදිසි ක්‍රියා සංසද සම්බන්ධීකරණ මධ්‍යස්ථානයේ අධ්‍යක්ෂ මෙහෙයුම් රෝහණ පල්ලියගුරු මහතා විසින් ද මේ ඉන්ධනහල් හරහා සිදුවන අපරාධය පිළිබඳ තොරතුරු හෙළිදරවු කළේය.

Dinamina


අප වෙබ් අඩවියේ පලවන මෙම ප්‍රවෘත්තිය සදහා ප්‍රතිචාර දැක්වීමේ අයිතිය ඔබ සතුය. ඔබේ ප්‍රතිචාරය lankaanews@gmail.com ඊ මේල් ලිපිනය වෙත යොමුකරන්න.
Lankaanews
Top