ජන්දෙට කැමති නම් උසාවි ගියේ ඇයි ? මන්ත්‍රී දිනේෂ් රනිල්ගෙන් අසයි

මැතිවරණයකට සූදානම් බව කියන හිටපු අගමැතිවරයා අධිකරණය ඉදිරියේ පාර්ලිමේන්තුව විසුරුවීමට එරෙහිව කරුණු දැක්වීම ගැටලු සහගත බව පාර්ලිමේන්තු මන්ත්‍රී දිනේෂ් ගුණවර්ධන මහතා පවසනවා.

බත්තරමුල්ල, නෙළුම් මාවතේ පිහිටි ශ්‍රී ලංකා පොදුජන පෙරමුණු ප‍්‍රධාන කාර්යාලයේ දී අද (4) පැවැති මාධ්‍ය හමුවකට එක් වෙමින් මන්ත‍්‍රීවරයා මේ බව සඳහන් කළා.

අගමැතිධූරයේ හා අමාත්‍ය ධූරයන් හි කටයුතු කිරීම අත්හිටුවමින් අභියාචනාධිකරණය දුන් තීන්දුව පිළිගන්න බැරි බව මහින්ද රාජපක්‍ෂ මහතා නිවේදනයක් නිකුත් කරමින් සඳහන් කළා. එම තීන්දුවට එරෙහිව අභියාචනාවක් ඉදිරිපත් කරන බවත් ඔහු සඳහන් කළා. ව්‍යවස්ථාව පිළිබඳ අර්ථ නිරූපණයක කිරීමේ පූර්ණ අයිතිය තිබෙන්නේ ශ්‍රේෂ්ඨාධිකරණයටයි. ඒ නිසා මේ සම්බන්ධයෙන් අපි ශ්‍රේෂ්ඨාධිකරණයෙන් අර්ථ නිරූපණයක් බලාපොරොත්තු වෙනවා.

හෙට (05) නැවත පාර්ලිමේන්තුව රැස්වන බව කතානායකවරයා දන්වා තිබෙනවා. පාර්ලිමේන්තුව නැවත නැවත රැස්වෙන්නේ කතානායකවරයාගේ කැළෑ නීතියට අනුවයි. සාමාන්‍ය ක‍්‍රමවේදය අනුව කතානායකවරයා තම අසුනේ අසුන් ගන්නෙත් ස්ථාවර නියෝගයන්ට අනුවයි.

නමුත් මේ කතානායකවරයා ආණ්ඩුක‍්‍රම ව්‍යවස්ථාව හා පාර්ලිමේන්තු ස්ථාවර නියෝග අනුව කටයුතු කරන්නේ නැහැ. මේ නිසා පාර්ලිමේන්තුව වලංගු නොවන තත්ත්වයකට පත්වෙලා.

ඇතිවී තිබෙන මෙම අර්බුදකාරී තත්ත්වය විසඳීමට නම් වහාම මහා මැතිවරණයක් පැවැත්විය යුතුයි. තමන් පාර්ලිමේන්තු මැතිවරණයකට කැමැති බව රනිල් වික‍්‍රමසිංහ මහතා ගාල්ලේ දී කිව්වා. මම ඒ ගැන පුදුම වෙනවා. මැතිවරණයකට කැමති නම් පාර්ලිමේන්තුව විසිරවීමේ තීරණයට එරෙහිව අධිකරණයට ගියේ ඇයි ?