You are here
Home > ආසන්න-පුවත් > තායිවාන මහා බැංකු කොල්ලයේ සැකකරුවන් වමාරයි

තායිවාන මහා බැංකු කොල්ලයේ සැකකරුවන් වමාරයි

ජාත්‍යන්තර වශයෙන් ශ්‍රී ලංකා නාමයට අපකීර්තියක් ඇති කළ තායිවානයේ තා ඊස්ටන් ඉන්ටර්නැෂනල් බැංකුවේ පරිගණක පද්ධියට සයිබර් උපක්‍රමයකින් ඇතුළු වී කළ මුදල් කොල්ලයට සම්බන්ධ බව කියන තවත් අයෙක් අත්අඩංගුවට ගනු ලැබීය. ඔහු අපරාධ පරීක්ෂණ දෙපාර්තමේන්තුවට බාරවීමෙන් පසුව අත්අඩංගුවට ගනු ලැබුවේ ඉකුත් 19 වැනිදාය.

රුපියල් ලක්ෂ තිහක මුදලක් ද සමඟ බාරවී සිටි ඔහු සිද්ධියේ ප්‍රධාන සැකකරුවන්ගෙන් කෙනකුගේ ළඟම ඥාතියකු බව වාර්තා වේ. ඔහුගෙන් සිදුකළ ප්‍රශ්න කිරීම්වලදී වංචාව පිළිබඳ වැදගත් තොරතුරු රැසක් අනාවරණය වෙමින් ඇතැයි පොලිස් ආරංචි මාර්ග සඳහන් කරයි.

මූල්‍ය වංචාවේ ප්‍රධාන සැකකාර නම්මුනි සහ ශලීල යන දෙන්නාට මූල්‍ය වංචාව සඳහා උදවු කළ අනෙක් පුද්ගලයන් වූයේ ඉන්දීය ජාතිකයන් දෙදෙනකි. ඔවුන් ලංකාවට පැමිණ දින කීපයක් හිල්ටන් රෙසිඩන්සීස් ගොඩනැගිල්ලේ නවාතැන් ගෙන සිට ඇති බවත් සගයන්ගේ අත්අඩංගුවට පත්වීමත් සමඟ ඔවුන් ඉන්දියාවේ මුම්බාය නගරය වෙත පලාගොස් ඇති බවත් හෙළිවිය. මෙරට සැකකරුවන් දෙන්නාට එරෙහිව මුදල් විශුද්ධිකරණ පනත යටතේ නඩු පවරා අධිකරණයට ඉදිරිපත් කළ අතර ජාත්‍යන්තර පොලීසිය දක්වා තිබුණේ සොරාගත් ඩොලර් මිලියන 60කට අධික මුදලෙන් ඩොලර් මිලියන 57ක් කාම්බෝජයට සහ ඩොලර් මිලියන දෙකක් ලංකාවට එවා ඇති බවය.

මූල්‍ය වංචාව පිළිබඳ විමර්ශනය සඳහා අපරාධ පරීක්ෂණ දෙපාර්තමේන්තුවේ නිලධාරින්ගේ සහායට තායිවාන් පොලිස් මූල්‍ය අපරාධ අංශ නිලධාරීන් දෙදෙනකු සහ ඊස්ටන් බැංකුවේ නිලධාරියෙක් පසුගියදා ලංකාවට පැමිණ තිබුණි. ඒ වනවිටත් වංචාවේ මහමොළකරුවන් අත්අඩංගුවට ගන්නට සී.අයි.ඩී. නිලධාරීන් සමත්ව සිටියහ.

ප්‍රධාන සැකකරුවන් දෙන්නා අපරාධ පරීක්ෂණ දෙපාර්තමේන්තු නිලධාරීන්ට පවසා තිබුණේ එකිනෙක පරස්පර කතාවන්ය. ඒ අනුව පළමු සැකකරුට වංචාව කිරීම සඳහා දෙවැනි සැකකරු අනුබල දුන් බව කියද්දී දෙවැනි සැකකරු කියා තිබුණේ ඔහුට පළමු සැකකරු අනුබල දුන් බවය. ඒ අනුව රහස් පොලීසියේ නිලධාරීන් අධිකරණයට දන්වා සිටියේ වෙනත් බාහිරව පාර්ශ්ව හරහා ලබාගන්නා තොරතුරු මත විමර්ශන සිදුකරන බවය. තවදුරටත් වාර්තා වී ඇත්තේ අමෙරිකානු බැංකුවේ මුදල් තායිවාන බැංකුවට ස්ලිප් ට්‍රාන්ස්ෆර් ක්‍රමයෙන් ලබාගෙන තිබෙන බවය.

අනතුරුව ඒවා ලංකා බැංකුවට යොමුකොට ඇති අතර මූල්‍ය වංචාවේ මහමොළකරුවන්ගේ ඉන්දීය මිතුරන් විසින් එය සිදුකර ඇතැයිද හඳුනාගෙන ඇත. එම ගනුදෙනුව අවසන් කිරීමෙන් පසුව ඉන්දීය හැකර්වරුන්ට 50%ක්ද නම්මුනිට 30% ද ඉතිරි 20% ශලීලට ලැබෙන සේ බෙදාගෙන ඇති බවද වාර්තා විය. එම ගනුදෙනුව ඉන්දීය මිතුරන් දෙන්නා නවාතැන්ගෙන සිටි හෝටලයේදී සිදුකර ඇති බවත් තවත් රටවල් කීපයක පුද්ගලයින් කීපදෙනකුට මුදල් ලබාදීමට නියමිතව තිබූ බවද සඳහන්ය.

ජානක නම්මුනි එංගලන්තය හා ශ්‍රී ලංකාව දෙරටේම පුරවැසි භාවය හිමි අයෙකි. ශලීල එංගලන්තයේ පුරවැසි භාවය හිමිය. ශලීල ලංකා බැංකුවේ ගිණුමක් විවෘත කර තිබුණේ 1990 නිකුත් කළ දත්ත මැකී ගිය හැඳුනුම්පතක් ඉදිරිපත් කරමිනි. මේ බව අපරාධ පරීක්ෂණ දෙපාර්තමේන්තුවේ නිලධාරින් විසින් අධිකරණයට දැනුම් දී තිබිණ.

අපරාධ පරීක්ෂණ දෙපාර්තමේන්තුවේ ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න, අධ්‍යක්ෂ ජ්‍යෙෂ්ඨ පොලිස් අධිකාරී ශානි අබේසේකර යන මහත්වරුන්ගේ අධීක්ෂණයෙන් පොලිස් අධිකාරී ඒ. අම්පාවිල ඇතුළු පිරිසක් විමර්ශන මෙහෙයවූහ.

 සමන්ත ප්‍රදීප් විල්තෙර

Top