තිස්ස සමාව ගන්න සූදානම් / අගමැති නඩුව අවසන් කරන්න එකගයි

එක්සත් ජාතික පක්ෂයේ හිටපු මහලේකම් තිස්ස අත්තනායක මහතාට එරෙහිව ගොනු කර ඇති නඩුව කෙටි ක්‍රමයකින් අවසන් කර ගැනීමට දෙපාර්ශවයම මේ වන විට එකඟතාව පළ කර ඇති බව අද කොළඹ මහාධිකරණයට දැනුම්දී තිබෙනවා.

නඩුව ගොනු කර ඇත්තේ, වත්මන් ජනාධිපති වරයාගේ සහ වත්මන් අගමැතිවරයාගේ අත්සන් ව්‍යාජ ලෙස යොදා, පසුගිය ජනාධිපතිවරනය සමයේදී කූඨ ලේඛනයක් මාධ්‍ය වෙත ඉදිරිපත් කිරීමෙන් ජාතිවාදය ඇවිස්සීමේ ක්‍රියාවක නිරතවූ බවට චෝදනා කරමිනුයි.

නඩුව මහාධිකරණ විනිසුරු විකුම් කලුආරච්චි මහතා ඉදිරියේ අද කැඳවූ අවස්ථාවේදී නියෝජ්‍ය සොලිසිටර් ජනරාල් දිලීප පීරිස් මහතා පවසා සිටියේ මෙම අධිචෝදනා ඉවත් කර ගැනීම සම්බන්ධයෙන් විත්ති පාර්ශවය නීතිපතිවරයා වෙත ලිපියක් එවා ඇති බවයි.

තවද මෙම නඩුව සමථයකින් අවසන් කර ගැනීමට නඩුවේ පළමු සාක්ෂිකරු වන අග්‍රාමාත්‍ය රනිල් වික්‍රමසිංහ මහතා කැමැත්ත පළකර ඇති බව ඔහු වැඩිදුරටත් සදහන් කළා.

කෙසේ වෙතත් නඩු කටයුතු අවසන් කර ගැනීම සමාව අයැදීමකින් ද සිදුවේ ද වෙනත් ක්‍රමයකින් සිදුවේ ද යන්න දැන ගැනීමට තම සේවාදායකයා අපේක්ෂා කරන බව රනිල් වික්‍රමසිංහ මහතා වෙනුවෙන් පෙනී සිටි නීතිඥ නිරෝශන් පෙරේරා මහතා මෙහිදී පවසා තිබෙනවා.

නඩුවේ දෙවැනි සාක්ෂිකරු වන ජනාධිපතිවරයාගේ ස්ථාවරය දැන ගැනීමට , ජනාධිපතිවරයා වෙත ලිඛිතව දැනුම් දීමට බලාපොරොත්තු වන බව නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් දිලිප පීරිස් මහතා දැනුම් දුන්නා.

නඩුව කෙටි ක්‍රමයකින් සමාව අයැදීමකින් අවසන් කර ගැනීමට අපේක්ෂා කරන බවයි තිස්ස අත්තනායක මහතා වෙනුවෙන් පෙනී සිටි ජනාධිපති නීතිඥ කාලිංග ඉන්ද්‍රතිස්ස මහතා මෙහිදී කියා සිටියේ.

මෙම සමතවීම සම්බන්ධයෙන් ප්‍රගතිය දැන ගැනීමට නඩුව මාර්තු මස 25 කැඳවීමට නියමිතයි.


මෙම පුවතට අදාළව ප්‍රතිචාර දැක්වීමේ අයිතිය ඔබ සතුය. එම ප්‍රතිචාර lankaanews@gmail.com යන ඊ මේල් ලිපිනය වෙත යොමුකරන්න