අල්ලස් ගැනීමට වරදකරුවූ අයෙක් ජනපති සමාවෙන් ගෙදර යයි

අල්ලස් චෝදනාවකට වරදකරු වී වසර 18ක බරපතළ වැඩ සහිත සිරදඬුවම් නියම වී සිටි වරකාපොළ ප්‍රාදේශිය සභාවේ හිටපු සභාපති ලක්‍ෂමන් පතිරාජ සමරසිංහට ජනාධිපති සමාව ලැබී ඇති හෙයින් කොළඹ මහාධිකරණ විනිසුරු ශෂි මහෙන්ද්‍රන් මහතා විසින් එම පුද්ගලයා නිදහස් කර තිඛෙනවා.

වරකාපොළ ප්‍රදේශයේ මාර්ග තුනක් ඉදිකිරීමට අදාළ කොන්ත්‍රාත්තුව ලබාදීම සඳහා කොන්ත්‍රාත්කරුවෙකුගෙන් රුපියල් 25,000ක අල්ලසක් ඉල්ලා ලබාගැනීමේ චෝදනාවට වරදකරු කරමින් ඔහුට දඩුවම් නියම කර තිබුණා.

අනතුරුව අභියාචනාධිකරණය විසින්ද එම දඩුවම සනාථ කර තිබියදීයි ආණ්ඩුක්‍රම ව්‍යවස්ථාව යටතේ ජනාධිපතිවරයාට ලැබී ඇති බලතල යටතේ අදාළ සභාපතිවරයා මෙසේ නිදහස් කර ඇත්තේ.

1995 ජනවාරි මස පළමුවැනිදාත් ජනවාරි මස 31 වැනිදාත් අතර කාලයේ වරකාපොළ ප්‍රාදේශිය සභාවේ සභාපතිවරයා ලෙස කටයුතු කරමින් සිටියදී කොන්ත්‍රාත්කරුවකුගෙන් රුපියල් 25,000ක අල්ලසක් ඉල්ලා ලබාගත් බවට විත්තිකරුට එරෙහිව චෝදනා පහක් යටතේ නඩු පවරා තිබුණා.

ඔහුට එරෙහි දඩුවම නියම කර තිබුණේ 2009 ඔක්තෝබර් 29 වැනිදායි.

විත්තිකරු වරදකරු කළ චෝදනා තුනට ඔහුට වසර 18ක බරපතල වැඩ සහිත සිරදඬුවම් නියම කළ මහාධිකරණ විනිසුරුවරයා එම දඬුවම වසර 06ක කාලයකින් ගෙවී යන පරිදි ක්‍රියාත්මක කිරීමටද නියම කර තිබුණා.

දඬුවමට එරෙහිව විත්තිකරු 2010 මාර්තු මස 31 වැනිදා විත්තිකරු අභියාචනයක් ඉදිරිපත් කොට තිබූ අතර එය විභාග කළ අභියාචනාධිකරණය, මහාධිකරණයේ තීන්දුව තහවුරු කරමින් අභියාචනය ප්‍රතික්ෂේප කිරීමටයි පියවර ගනු ලැබුවේ.


මෙම පුවතට අදාළව ප්‍රතිචාර දැක්වීමේ අයිතිය ඔබ සතුය. එම ප්‍රතිචාර lankaanews@gmail.com යන ඊ මේල් ලිපිනය වෙත යොමුකරන්න

Leave a Reply

Your email address will not be published.