ලංකාවේ පළමු චන්ද්‍රිකාව සාර්ථකව කක්ෂගත කරයි-Video

මොරටුව ආතර් සී ක්ලාක් මධ්‍යස්ථානයේ ඉංජිනේරුවරුන් දෙදෙනෙකු නිර්මාණය කළ රාවණා 01 චන්ද්‍රිකාව අද ජාත්‍යන්තර අභ්‍යාවකාශ මධ්‍යස්ථානයේ සිට සාර්ථකව කක්ෂගත කෙරුණා.
ඒ අනුව ලෝකයේ චන්ද්‍රිකාවක අයිතිය සතු 88වන රට බවටයි ශ්‍රී ලංකාව පත්වන්නේ.
රාවණා 1 චන්ද්‍රිකාව නිෂ්පාදනය කරන ලැබුවේ පේරාදෙණිය විශ්වවිද්‍යාලයේ ඉංජිනේරු උපාධිධාරීයෙකු වන තරිඳු දයාරත්න සහ තායිලන්තයේ ආසියානු තාක්ෂණ ආයතනයේ උපාධිධාරිනියක වන දුලානි චාමිකා විතානගේ විසින්.
ජපානයේ කියුෂු තාක්ෂණික ආයතනයේ අභ්‍යවකාශ ඉංජිනේරු තාක්ෂණය හදාරමින් සිටින අතරතුර ඔවුන් එම චන්ද්‍රිකාව නිෂ්පාදනය කරනු ලැබුවේ බර්ඩ්ස්-3 ව්‍යාපෘතිය යටතේයි.
නාසා ආයතනයට අයත් අමෙරිකාවේ වර්ජිනියාහි පිහිටි මධ්‍ය අත්ලාන්තික් ප්‍රාදේශීය අභ්‍යවකාශ තොටුපළෙන් අප්‍රේල් මස 18 වන දා රාවණා 1 අභ්‍යවකාශගත කෙරුණේ ඇන්ටරේස් රොකට්ටුවක ආධාරයෙනුයි.
අප්‍රේල් 19 වැනිදා පස්වරු 6.30 ට පමණ එය ජාත්‍යන්තර අභ්‍යවකාශ මධ්‍යස්ථානයට ළඟාවුණා.