නව අගමැති මහින්ද / දිවුරුම්දීම පස්වරුවේ

මහින්ද රාජපක්ෂ මහතා නව අගමැතිවරයා ලෙස ජනාධිපති ලේකම් කාර්යාලයේදී අද (21) දිවුරුම්දීමට නියමිතව තිබෙනවා.

මහින්ද රාජපක්ෂ මහතා මෙරට අගමැතිවරයා ලෙස පත්වන තුන්වැනි අවස්ථාව මෙයයි.

නව අගමැතිවරයා ලෙස දිවුරුම් දීමෙන් අනතුරුව අද දිනයේදීම සිය ධුරයේ රාජකාරී ආරම්භ කිරීමට මහින්ද රාජපක්ෂ මහතා කටයුතු කරනු ඇතැයි දේශපාලන ආරංචි මාර්ග පවසයි.

නව අගමැතිවරයා දිවුරුම්දීමෙන් පසු නව කැබිනට් මණ්ඩලය අද දිනයේ හෝ හෙට දිනයේ පත්කිරීමට නියමිත බවද වාර්තාවනවා.

මෙම භාරකාර ආණ්ඩුව අමාත්‍යවරුන් 15 දෙනකුගෙන් සමන්විත වන බවයි පැවසෙන්නේ.

සිය ප්‍රතිපත්ති ක්‍රියාත්මක කිරීමට නව ආණ්ඩුවක් පත් කර ගැනීමට අවශ්‍ය බව ජනාධිපති ගෝඨාභය රාජපක්ෂ මහතා පෙරේදා පැවැති සාකච්ඡාවේ දී දැනුම්දී තිබුණා.

ඒ අනුව ජනාධිපතිවරයාට නව ආණ්ඩුවක් පිහිටුවීමට අවකාශ සලසමින් අගමැති ධුරයෙන් ඉල්ලා අස්වීමට තීරණය කළ බව අගමැති රනිල් වික්‍රමසිංහ මහතා ඊයේ (20) නිවේදනය කළා.