දෙවැනි එල්.පී.එල්. තරගාවලියේ වේගවත්ම අර්ධ ශතකයට හිමිකම් කියා සිටින තිසර පෙරේරා පන්දු 23 කදී රැස් කරන ලද වේගවත් ලකුණු 57 ක ඉනිම ප්රධාන කොට කලම්බු ස්ටාර්ස් පිලට එරෙහිව පැවැති තරගයෙන් ලකුණු @ ක ජයක් අත්කර ගැනීමට ජැෆ්නා කිංග්ස් පිල අද (10 දා) සමත්විය. මෙය මෙවර තරගාවලියේ තරග 4 කට සහභාගිව සිටින ජැෆ්නා කිංග්ස් කණ්ඩායම වාර්තා කරන ලද තෙවැනි ජයග්‍රහණය ලෙසින්ද සනිටුහන් විය.
වර්ෂාව හේතුවෙන් එක් පිලකට පන්දුවාර 18 කට සීමාවූ තරගයක් ලෙසින් පැවැති මෙම තරගයේදී මුලින් පන්දුවට පහර දුන් ජැෆ්නා පිල කඩුලු 6 කට ලකුණු 208 ක ඉලක්කයක් ස්ටාර්ස් පිල හමුවේ තැබීය. එය හඹා යෑමේදී කලම්බු ස්ටාර්ස්ට පන්දුවාර 15.5 කදී සියලු දෙනා දැවී රැස් කර ගත හැකි වූයේ ලකුණු 114 ක් පමණි. එම ජයග්‍රහණයත් සමඟ ජැෆ්නා පිල ප්‍රසාද ලකුණු සටහනේ පෙරමුණට පැමිණ සිටියි.
ලකුණු හඹා යෑමේදී පළමු පන්දුවෙන්ම කුසල් පෙරේරාව දවා ගත් මහීෂ් තීක්ෂණ තරග ආරම්භයට උද්‍යෝගයක් ලබා දුන්නේය. එතැනින් නොනැවතුණු මහීෂ් යළිත් තෙවැනි පන්දුවාරයේදී ටොම් බැන්ටන්ව දවා ගනිමින් තවත් පීඩනය තර කළේය. මහීෂ් සමඟ කරට කර පන්දු යැවීමක නිරත වූ වහාබ් රියාස් ද කඩුලු දවා ගැනීමේ සංදර්ශනයට එක් වෙමින් ස්ටාර් පිලට දැඩි අභියෝගක් ගෙන දුන්නේය. මෙම තත්ත්වය ප්රධාන කොට පවර් ප්ලේ අවස්ථාවට හිමි පන්දුවාර 6 අවසන් වන විට ස්ටාර්ස් පිලේ ලකුණු පුවරුව ලකුණු 32 කට කඩුලු 5 ක් ලෙසින් සටහන් විය.
එහෙත් 6 වැනි කඩුල්ලට එක්වූ අශාන් ප්‍රියන්ජන් සහ දිනේෂ් චන්දිමාල් ජයග්‍රහණය පසෙකලා ගෞරවනීය ලකුණු සංඛ්‍යාවක් කරා කණ්ඩායම රැගෙන ගියේ ලකුණු 65 ක සම්බන්ධතාවක් පවත්වමින්. පන්දුවෙන් පන්දුව දැඩි අභියෝගයක් ගෙන දෙමින් පන්දු යැවූ ජැෆ්නා පන්දු යවන්නන් අතරින් තීක්ෂණ සහ රියාස් කඩුලු 4 බැගින් බිඳ හෙළූහ. පන්දුවාර 4 ම ක්‍රියාත්මක කළ දකුණත් සහ වමත් පන්දු යවන්නන් දෙපළ පිළිවෙළින් ලකුණු 23 සහ 26 බැගින් ලබා දුන්හ. අද තරගයේදී දවා ගන්නා ලද කඩුලු 4 ත් සමඟ මෙවර තරගාවලියේ වැඩිම කඩුලු ලාභීන්ගේ ලැයිස්තුවේ පෙරමුණට පැමිණීමට තීක්ෂණ සමත්ව සිටියි. මෙතෙක්තරග 4 කදී තීක්ෂණ දවා ගෙන සිටින කඩුලු සංඛ්‍යාව 8 කි.
මෙවර තරගාවලියේ අර්ධ ශතක 2 ක් වාර්තා කරන ලද දෙවැනි පිතිකරුවා බවට පත්වූ තිසර පෙරේරා රැස් කරන ලද අර්ධ ශතකයද සමඟ ඉදිරි පෙළ පිතිකරුවන් 5 දෙනාගෙන් සිව් දෙනෙකුම ලකුණු 40 සීමාව ඉක්මවාලමින් ලකුණු රැස් කළහ. හයේ පහර 5 ක් සහ හතරේ පහර 3 ක් ද ඇතුළත් තිසරගේ ඉනිමට අමතරව ටොම් කොලර්-කැඩ්මෝර් (40, ෂොයෙබ් මලික් (44), සහ අෂේන් බණ්ඩාර (42) එම පිතිකරුවෝ වූහ. මේ අතරින් අෂේන් බණ්ඩාරගේ පමණක් ප්‍රහාරාත්මක වේගය ලකුණු 140 ක් බවට පත් වද්දී සෙසු තිදෙනාගේම ප්‍රහාරාත්මක අගය 183 ඉක්මවා ගියහ. එහිදී කොලර්-කැඩ්මෝර් 190.47 ක්, ෂොයෙබ් මලික් 183.33 ක් සහ තිසර පෙරේරා 247.82 ක් වශයෙන් රඳවා ගනිමින් ලකුණු රැස් කළහ.
මෙම සුවිශේෂී පිතිහරඹය ප්රධාන කොට ජැෆ්නා කිංග්ස් රැස් කරන ලද ලකුණු 207 දෙවැනි එල්.පී.එල්. තරගාවලියේ කණ්ඩායමක් රැස් කරන ලද වැඩිම ලකුණු සංඛ්‍යාව සේම එල්.පී.එල්. තරග ඉතිහාසයේ සිව්වැනි වැඩිම ලකුණු සංඛ්‍යාව සම කරවන්නක් විය. මෙතෙක් තරග ඉතිහාසයේ කණ්ඩායමක් රැස් කර ඇති වැඩිම ලකුණු සංඛ්‍යාව වන 219, ජැෆ්නා, කැන්ඩි කණ්ඩායම් සතුව පවතිද්දී ලකුණු 218 ක් රැස් කරන ලද ජැෆ්නා කණ්ඩායම තෙවැනි ස්ථානයේ පසුවේ. අද රැස් කරන ලද ලකුණු සංඛ්‍යාවේ ඇති සුවිශේෂීතාව වන්නේ එය පන්දුවාර 18 ක තරගයක් ලෙසින් පැවැතීම වේ.
පන්දු යවන්නන් ගත් විට දුෂ්මන්ත චමීර, කීමා පෝල් සහ තික්ෂිල ද සිල්වාට තිසර ඇතුළු ප්‍රතිවාදී පිතිකරුවන්ගේ ප්‍රහාරාත්මක පිතිහරඹය පාලනය කිරීමට අපොහොසත් වද්දී සීක්කුගේ ප්‍රසන්න පමණක් තම පන්දුවාර 4 ලකුණු 31 කට සීමා කොට කඩුලු 3 ක් දවා ගත්තේය. වැඩිම ප්‍රහාරයකට ලක් වූයේ දුෂ්මන්ත චමීරය. පළමු පන්දුවාර 2 ලකුණු 12 කට සීමා කරමින් එක් කඩුල්ලක් දවාගැනීමට සමත්ව සිටි චමීර ක්‍රියාත්මක කරන ලද 16 වැනි පන්දුවාරයේදී අනුකම්පා විරහිත ප්‍රහාරයක් දියත් කළ තිසර පෙරේරා හයේ පහර 3 ක් සහ හතරේ පහරක්ද සමඟින් ලකුණු 23 ක් උදුරා ගත්තේය. ඉන් නොනැවතුණු තිසර සහ චතුරංග ද සිල්වා අවසන් පන්දුවාරයේදී ද තවත් ලකුණු 20 ක් උදුරා ගත්තේ චමීගේ පන්දු යැවීම පන්දුවාර 4 කට ලකුණු 54 ක් තරම් දරුණු ප්‍රහාරයකට ලක්කරමිනි.
තරගයේ වීරයා – තිසර පෙරේරා
ලකුණු සාරාංශය
ජැෆ්නා කිංග්ස් පන්දුවාර 18 කදී කඩුලු 6 ට ලකුණු 207 යි – (තිසර පෙරේරා 57*, ෂොයෙබ් මලික් 44, ටොම් කොලර්-කැඩ්මෝර් 40, අෂේන් බණ්ඩාර 42, සීක්කුගේ ප්‍රසන්න 31/3,අශාන් ප්‍රියන්ජන් 23/1, නවීන් උල් හක් 36/1, දුෂ්මන්ත චමීර 54/1)කලම්බු ස්ටාර්ස් පන්දුවාර 15.5 කදී සියලු දෙනා දැවී ලකුණු 114 යි (අශාන් ප්‍රියන්ජන් 35, ටොම් බැන්ටන් 18, ශෙර්ෆන් රදර්ෆර්ඩ් 10, දිනේෂ් චන්දිමාල් 28, මහීෂ් තීක්ෂණ 25/4, වහාබ් රියාස් 26/4, වනිඳු හසරංග 17/2)