ජනාධිපති රනිල් වික්‍රමසිංහ මහතා පළාත් පාලන මැතිවරණය සම්බන්ධයෙන් ප්‍රකාශයක් කර පිටව යෑමට සූදානම්වූ අවස්ථාවේදී සමගි ජන බලවේගය සහ නිදහස ජනතා පෙරමුණේ මන්ත්‍රීවරුන් සභාගර්භය මැදට පැමිණ විරෝධතා පෝස්ටර් ඔසවමින් ඡන්දය ඉල්ලා හඬ නැගීම හේතුවෙන් පාර්ලිමේන්තුවේ උණුසුම් තත්වයක් අද (23) පෙරවරුවේ ඇතිවිය.
මෙය පළාත් පාලන මැතිවරණය ලබාදෙන ලෙසට බල කරමින් විපක්ෂය මැතිසබයේ පැවැත්වූ දෙවැනි විරෝධතාවයි.
මේ විරෝධතාව හේතුවෙන් සභාවේ කටයුතු පවත්වාගෙන යෑමට කතානායක මහින්ද යාපා අබේවර්ධන මහතාට දැඩි පරිශ්‍රමයක් දැරීමට සිදුවිය.
ජනාධිපතිවරයා ඉහත ප්‍රකාශය කළ අවස්ථාවේදීද එම මන්ත්‍රීවරුන් සිය අසුන්වලින් නැගිට ජනාධිපති වරයාට විරෝධය පළ කරනු දැකගත හැකිවිය.
සමහරු රීති ප්‍රශ්න මතු කරමින් ජනාධිපතිවරයාගෙන් විවිධ දේ විමසූහ.
ජනාධිපතිවරයා ඒ සෑම ප්‍රශ්නයකටම පිළිතුරු දුන්නේය.
ජනාධිපතිවරයාගේ කතාවට සවන්දී සිටි ආණ්ඩු පක්ෂයේ මන්ත්‍රීවරුන් සිය අසුන් වලටවලට වරින් වර තට්ටු කරමින් ප්‍රසාදය පළ කරනු ද දැකගත හැකිවිය.
කෙසේ වෙතත් මේ විරෝධය පැවැත්වෙන අවස්ථාවේදී ජනතා විමුක්ති පෙරමුණේ මන්ත්‍රීවරුන් කිසිවකුත් සභාගර්භයේ සිටියේ නැත.
එම විරෝධය පැවැත්වෙන අතරතුරදීම අත්‍යවශ්‍ය සේවා පනත යටතේ නියෝග පිළිබඳ විවාදය ආරම්භවූ අතර එය උද්ඝෝෂණය අතරේම කරගෙන යනු දැක ගත හැකිවිය.