Skip to content
ආන්දෝලනාත්මක ප්‍රකාශයක් සිදුකළ ශ්‍රී ලාංකික දේවගැති ජෙරොම් ප්‍රනාන්දු සහ සිම්බාබ්වේ දේවගැති යූබර්ට් ඒන්ජල් සමඟ කිසිදු ආකාරයක සම්බන්ධයක් නොමැති බව හිටපු ජනාධිපති මහින්ද රාජපක්ෂ මහතා ප්‍රකාශ කර ඇතැයි වාර්තා කර තිබෙනවා.
රාජපක්ෂ මහතා අග්‍රාමාත්‍යවරයා ලෙස කටයුතු කරන සමයේ දේවගැති ජෙරොම්ගේ කාර්යාලයේ ඉල්ලීමක් මත පමණක් මෙම හමුව සිදුව තිබූ බව එම ප්‍රකාශය මගින් දැනුම් දී තිබුණා.
එවකට ආගමික කටයුතු අමාත්‍යවරයා ලෙස කටයුතු කළේ තමන් බැවින් අග්‍රාමාත්‍ය කාර්යාලය සමඟ මෙම හමුව සූදානම් කර තිබූ බවයි රාජපක්ෂ මහතා වැඩිදුරටත් කියා සිටියේ.
“එය සුහද හමුවක් වූ අතර එහිදී දේවගැතිවරුන් දෙදෙනාම මා සහ මගේ බිරිඳ වෙනුවෙන් කුඩා යාඥාවක් පවත්වන ලදී, එම ඡායාරූප මාධ්‍ය වෙත නිකුත් කර ඇත. මට දේවගැති ජෙරොම් සහ යූබර්ට් ඒන්ජල් මුණගැසී ඇත්තේ එම අවස්ථාවේදී පමණක් වන අතර ඔවුන් දෙදෙනා සමඟ මට පෞද්ගලික සම්බන්ධයක් නොමැත, ”- මහින්ද රාජපක්ෂ
දේවගැති ජෙරොම් පසුගිය දා ආගමික සභාවක් අතරතුර කළ ආන්දෝලනාත්මක ප්‍රකාශ හෙළා දකිමින් මහින්ද රාජපක්ෂ මහතා ප්‍රකාශ කළේ ශ්‍රී ලංකාව තුළ ජාතිවාදී අසමගියකට ඉඩක් නොමැති බවයි.
“ශ්‍රී ලංකාව තුළ වාර්ගික අසමගිය ඇති කිරීමට උත්සාහ කරන ඕනෑම පුද්ගලයෙකු විසින් කරන ලද ප්‍රකාශයන් මම දැඩි ලෙස හෙළා දකිමි,” – මහින්ද රාජපක්ෂ
ජෙරොම් ප්‍රනාන්දු දේවගැතිවරයාට විදේශ ගමන් තහනමක් පැනවූ සිද්ධිය සම්බන්ධයෙන් පරීක්ෂණයක් ආරම්භ කරන ලෙස ජනාධිපති රනිල් වික්‍රමසිංහ මහතා අපරාධ පරීක්ෂණ දෙපාර්තමේන්තුවට නියෝග කර තිබුණි.
කෙසේ වෙතත්, දේවගැතිවරයා ඉරිදා (මැයි 14) රටින් පිටව ගොස් ඇති බව අනාවරණය වී තිබුණා.