අම්පාර දිස්ත්‍රික්කයේ පල්ලක්කාඩු ගම්මානයේ කුණු කන්දේ ,ප්ලාස්ටික් ආහාරයට ගැනීමෙන් අලි ඇතුන් 20ක් පමණ පසුගිය වසර අට තුළ දී මියයාම පිළිබද සුප්‍රකට හොලිවුඩ් රංගන ශිල්පී ලියනාඩෝ ඩික්‍රැප්‍රියෝ අවධානය යොමුකර තිබෙනවා.
දේශගුණික විපර්යාස සම්බන්ධයෙන් කටයුතු කරන එක්සත් ජාතීන්ගේ නියෝජිතවරයෙකු වන ඔහු පරිසරවේදියකු ද වන අතර ලංකාවේ අලි සම්බන්ධ ඇසෝසියේටඩ් ප්‍රෙස් වාර්තාවක් සිය නිල ට්විටර් ගිණුම හරහා ප්‍රසිද්ධ කිරීමටයි ඔහු කටයුතු කර ඇත්තේ.
මෙම කසල කන්ද ආශ්‍රිතව මියගිය සතුන් පරීක්ෂා කිරීමේදී ඔවුන් කුණු කන්දේ ඇති දිරාපත් නොවන ප්ලාස්ටික් විශාල ප්‍රමාණයක් ගිල දමා ඇති බව වනජීවී පශූ වෛද්‍යවරුන් හෙළි කර තිබුණා.
අලි ඇතුන් ශ්‍රී ලංකාවේ ගෞරවයට පාත්‍ර වන නමුත් වඳවීමේ තර්ජනයට ලක්ව ඇති අතර රටේ පළමු අලි සංගණනයට අනුව ඔවුන්ගේ සංඛ්‍යාව 19 වන සියවසේ 14,000 ක සිට 2011 වන විට 6,000 දක්වා පහත වැටී තිබෙනවා.
අලි ඇතුන් ප්ලාස්ටික් අපද්‍රව්‍ය පරිභෝජනය කිරීම වැළැක්වීම සඳහා වනජීවී කලාප අසල කසළ ප්‍රතිචක්‍රීකරණය කරන බව 2017 දී රජය නිවේදනය කළද එය නියමිත පරිදි ඉටු නොවූ බවයි ඇසෝසියේටඩ් ප්‍රෙස් පවසන්නේ.
එම ස්ථාන වටා විදුලි වැටවල් ඉදිකරන බවට පොරොන්දු ලබාදී තිබුණද එය ද ඉටුව නැහැ.
දිවයින පුරා වනජීවී කලාපවල අපද්‍රව්‍ය ගොඩකිරීම් 54ක් පවතින අතර, ඒ අවට අලි ඇතුන් 300ක් පමණ ගැවසෙන බව වනජීවී අංශ හෙළිකර තිබෙනවා.
පල්ලක්කාඩු ගම්මානයේ අපද්‍රව්‍ය කළමනාකරණ අඩවිය 2008 දී යුරෝපා සංගමයේ ආධාර ඇතිව පිහිටුවනු ලැබූ අතර අවට ගම් නවයකින් එකතු වන කසළ එම ස්ථානයේ ගොඩගැසෙමින් පවතිනවා.
මේ සමග තවත් වන අලින් රැසක්ම ජීවිත අවදානමක පසුවන බවයි ජාත්‍යන්තර වාර්තා පෙන්වා දී ඇත්තේ.