ලිට්රෝ සමාගම විසින් ආනයනය කර තිබූ ගෑස් නෞකා තුනෙන්, දෙකක ඇති ගෑස් වෙළඳපලට නිකුත් කිරීමට අනුමැතිය ලබාදුන් බව ගෑස් සම්බන්ධ කටයුතු සම්බන්ධීකරණය සඳහා පත්කර සිටින, තාක්ෂණ අමාත්යාංශයේ ලේකම් ජයන්ත ද සිල්වා මහතා පවසනවා.
මෙම නෞකා දෙකෙහි ඇති ගෑස් නිසි ප්රමිතියෙන් යුත් බවත්, ඒවායෙහි ප්රොපේන් හා බියුටේන් සංයුතිය මෙන්ම ගන්ධය ඇතිකරන ඊතයිල් මර්කැප්ටන් රසායන ද්රව්යය ද නිසි පරිදි ඇතුළත් බව ද ලේකම්වරයා සදහන් කළා.
අනෙක් නෞකාවේ ඇති ගෑස්වල ද ප්රොපේන් හා බියුටේන් සංයුතිය නියමිත පරිදි ඇතත්, ඊතයිල් මර්කැප්ටන් අවශ්ය ප්රමාණය නොතිබීම නිසා එය ගොඩබෑමට අවසර දිය නොහැකි බව ද දැනුම් දී තිබෙනවා.
දැනට ගොඩබෑමට අවසර නොදුන් නෞකාවේ ඇති ගෑස් නියමිත ප්රමිතියට ගෙන එන තුරු ගොඩබෑමට අවසර නොදෙන බවත්, නිසි ප්රමිතියට ගෙන ආ පසුත් ප්රොපේන්, බියුටේන් පරීක්ෂණයන් ද නැවත සිදුකර පරීක්ෂා කරන බවත් ලේකම්වරයා සදහන් කළා.
මෙම නැව් තුනෙහිම ඇති ගෑස්වල ප්රොපේන් සංයුතිය සියයට 30 ඉක්මවා නොමැති බව ද අනාවරණවී තිබෙනවා.