අගනුවර පිහිටි නිවසට එල්ල වූ ප්‍රහාරයකින් හයිටි ජනාධිපති යොවෙනෙල් මොයිස් (Jovenel Moïse) ඝාතනය කර ඇති බව එරට අන්තර්වාර අගමැතිවරයා පවසයි.
අගමැති ක්ලෝඩ් ජෝසෆ් (Claude Joseph) පවසන්නේ, එරට වේලාවෙන් අලුයම එකට පමණ හඳුනානොගත් ආයුධ සන්නද්ධ කණ්ඩායමක් පොර්ට් – ඔ – ප්‍රින්ස් (Port-au-Prince) අගනුවර පිහිටි ජනාධිපතිවරයාගේ නිවසට කඩා වැදී ඇති බවය.
ප්‍රහාරයෙන් ජනාධිපති ආර්යාව ද තුවාල ලබා ඇති බව වාර්තා වේ.
“රාජ්‍යයේ කටයුතු දිගටම පවත්වාගැනීම පිණිස සියලු පියවර ගෙන තිබෙන,” බව ද අගමැතිවරයා පැවසීය.
හිටපු ජනාධිපති මිචෙල් මාට්ලි (Michel Martelly) 2017 දී පදවියෙන් ඉල්ලා අස්වීමෙන් අනතුරුව 53 හැවිරිදි යොවෙනෙල් මොයිස් හයිටි රාජ්‍යයේ ජනපති පදවියට පත්විය.
පදවියට පත්වීමෙන් අනතුරුව ඔහුට බරපතල දූෂණ චෝදනා එල්ල වූ අතර, නිරන්තරයෙන් ප්‍රචණ්ඩ ආණ්ඩු විරෝධී උද්ඝෝෂණවලට ද මුහුණදීමට සිදුවිය.
bbc sinhala