රටේ පවතින ආර්ථික දුෂ්කර අවස්ථාවේ භික්ෂූන් වහන්සේලාට දානය සකස් කිරීමේදී වෑංඡනයකට දෙකකට සීමා කර ඉතාමත් සරලව දානය පිළියෙල කරන්නැයි සමස්ත භික්‍ෂූ පරපුර වෙනුවෙන් සියලූ පිංවතුන්ට කරුණාවෙන් මතක් කරන බව ආචාර්ය ඕමල්පේ සෝභිත හිමියන් ප්‍රකාශ කළා.
ඇඹිලිපිටියේ පැවැති මාධ්‍ය හමුවකදී ආචාර්ය ඕමල්පේ සෝභිත හිමියන් අවධාරණය කළේ , භාණ්ඩවල මිල පාලනයට බලධාරීන් ඉදිරිපත් නොවන තත්ත්වයක් පවතින බැවින් දායකයන්ගේ ගැටළු භික්ෂූන් වහන්සේලා හඳුනාගත යුතු බවයි.
‘දායක පින්වතුන්ගේ කාරුණික අනුග‍්‍රහයෙන් තමයි භික්ෂූන් වහන්සේලා යැපෙන්නේ. භාණ්ඩවල මිල පාලනය සම්පූර්ණයෙන් ම ගිලිහිලා රජයක පාලනයක් වන බවක් පේන්න නැතිකම වර්තමානයේ ඇති ලොකුම ගැටලූවයි.
‘ඒ නිසා දායකදායිකාවන් දානමාන පිරිනැමීමේ දී ඉතාම අපහසුතාවකට පත්වන බව ඉතාමත් ම පැහැදිලියි. එබැවින් මේ දුෂ්කර අවස්ථාව සලකලා සරල විදියට දානමාන ආදිය සකස් කරන ලෙස සමස්ත භික්ෂූන් වහන්සේලා වෙනුවෙන්ම දායක දායිකාවන්ගෙන් ඉල්ලා සිටිනවා.
‘විශාල වශයෙක් පුදපූජා වැනි දේ සංවිධානය කරන්න එපා. ප‍්‍රදර්ශනාත්මක දානමානාදී පුදපූජා සංවිධානය කරන්න එපා. ඉතාමත් සරලව අවස්ථානුකූලව, දානය සකස් කරන්න කියලා අපේ පිංවතුන්ට කරුණාවෙන් මතක් කරනවා.