රුසියානු ඉන්ධන මිලදී ගැනීම සඳහා ණයක් ලබා ගැනීම සම්බන්ධයෙන් ශ්‍රී ලංකා බලධාරීන් රුසියාව සමඟ දිගටම සාකච්ඡා පවත්වා ගෙන යන බව ප්‍රවාහන හා මහාමාර්ග ඇමති සහ ජනමාධ්‍ය ඇමති බන්දුල ගුණවර්ධන රුසියාවේ ස්පුට්නික් පුවත් සේවය සමඟ පැවති සම්මුඛ සාකච්ඡාවකට එක්වෙමින් පවසා තිබේ.
ශ්‍රී ලංකාව, ආර්ථික සහ විදේශ විනිමය අර්බුදයෙන් සෙමෙන් යථා තත්වයට පත් වෙමින් සිටින බවද ඔහිදී ඔහු පවසා ඇත. මෙම අවස්ථාවේ රුසියාවෙන් විශාල සහායක් බලාපොරොත්තු වන බවත් ණය ලබා ගැනීම සම්බන්ධයෙන් පවත්වන සාකච්ඡාවල සුභදායී ප්‍රගතියක් තිබෙන බවත් ඇමති බන්දුල ගුණවර්ධන එමිදී සඳහන් කර තිබේ.රුසියාවෙන් තෙල් මිලදී ගැනීමට සහ රටේ පවතින ඉන්ධන අර්බුදයට සහනයක් ලබා ගැනීමට ශ්‍රී ලංකාවට ණයක් ලබා දෙන ලෙස ශ්‍රී ලංකා හිටපු ජනාධිපති ගෝඨාභය රාජපක්ෂ රුසියානු ජනාධිපති ව්ලැදිමීර් පුටින්ගෙන් ඉල්ලා සිටි බවද ඇමති බන්දුල ගුණවර්ධන එහිදී ප්‍රකාශ කර ඇත.
එම්.අයි.ආර් ලෙස හැඳින්වෙන රුසියානු ගෙවීම් පද්ධතිය සමඟ සම්බන්ධ වීමේ හැකියාව පිළිබඳව ශ්‍රී ලංකා බලධාරීන්, රුසියානු බලධාරීන් සමඟ සාකච්ඡා කරමින් සිටින බවත් දෙරටේ මහ බැංකු අතරද මේ පිළිබඳව සාකච්ඡා පැවැත්වෙන බවත් ඇමති බන්දුල ගුණවර්ධන ස්පුට්නික් පුවත් සේවය සමඟ පැවති සම්මුඛ සාකච්ඡාවේදී ප්‍රකාශ කර තිබේ.
රුසියාවට පනවා ඇති සම්බාධක හේතුවෙන් මාස්ටර් සහ වීසා කාඩ්පත් රුසියානු ජාතිකයින්ට භාවිත කළ නොහැකි නිසා රුසියානු ගෙවීම් පද්ධතියට සම්බන්ධ වූ විට ශ්‍රී ලංකාවට පැමිණෙන රුසියානු සංචාරකයින් හට රුසියානු ණය කාඩ්පත් සහ හර කාඩ්පත් භාවිත කිරීමට ඉඩ ලැබීම හේතුවෙන් ඔවුන්ට පහසුවක් වන බව ඇමති ඉබන්දුල ගුණවර්ධන එහිදී සඳහන් කර ඇත. මහ බැංකුවෙන් අනුමැතිය ලැබුණු පසු මේ බව නිවේදනය කරන බව ඔහු පෙන්වා දී තිබේ.
මේ අතර ඔහු රියා නොවස්ති පුවත් සේවය සමඟ පැවති සම්මුඛ සාකච්ඡාකට එක්වෙමන්, එරෝෆ්ලොට් ගුවන් සේවයට අයත් ගුවන් යානයක් ශ්‍රී ලංකාවේ රඳවා තබා ගැනීමේ සිද්ධිය පිළිබඳ තමන් සමාව අයැද සිටින බව ප්‍රකාශ කර ඇතැයි රුසියන් ටුඩේ පුවත් සේවය වාර්තා කරයි.
උසාවි නියෝගයක් මත එරෝෆ්ලොට් ගුවන් සේවයට අයත් ගුවන් යානාවක් ශ්‍රී ලංකාවේ රඳවා ගැනීම අවාසනාවන්ත සිදුවීමක් බවත් එය බරපතල අත්වැරැද්දක් බවත් ඒ සම්බන්ධයෙන් ශ්‍රී ලංකා බලධාරීන් සමාව අයැද සිටින බවත් ඇමති බන්දුල ගුණවර්ධන එම සම්මුඛ සාකච්ඡාවේදී ප්‍රකාශ කර ඇත. නැවත මෙවැනි දෙයක් සිදු නොවන බවට ජනාධිපති රනිල් වික්‍රමසිංහ, අග්‍රාමාත්‍ය දිනේෂ් ගුණවර්ධන සහ ශ්‍රී ලංකා රජය සහතික වන බවත් කිසිම ගුවන් යානයක් ශ්‍රී ලංකාවේදී අත් අඩංගුවට ගැනීමට අවශ්‍යතාවයක් නැති බවත් ඇමති බන්දුල ගුණවර්ධන එහිදී පැහැදිලි කර තිබේ.
ශ්‍රී ලංකාව සහ රුසියාව අතර ගුවන් ගමන් ඔක්තෝම්බර් මස මැද වනවිට ආරම්භ වනු ඇතැයි බලාපොරොත්තුවක් තිබෙන බව ඔහු එහිදී පෙන්වා දී ඇත.