රජයේ ආදායම් ප්‍රමාණවත් නොවන බැවින් මාර්තු සහ අප්‍රේල් මාසවල රාජ්‍ය සේවක වැටුප්, විශ්‍රාම වැටුප් සහ දීමනා ගෙවීම සඳහා ජාත්‍යන්තර මුල්‍ය අරමුදලෙන් ලැබුණු මුදල්වලින් කොටසක් ලබාගැනීමට සිදුව ඇති බව ජනමාධ්‍ය අමාත්‍ය බන්දුල ගුණවර්ධන පවසනවා.
මේ වන විට රජයේ ආදායම් අවම වී පවතින බැවින් මෙම පියවර අනුගමනය කරන බව ද සදහන් කළා.
“රාජ්‍ය මූලයේ තියෙන විශාලම අර්බුදය තමයි අපිට එදිනෙදා පවත්වාගෙන යාමේ වියදම් පියවාගන්න ප්‍රමාණවත් ආදායමක් නැහැ. උදාහරණයක් වශයෙන් මාර්තු මාසයට රාජ්‍ය සේවකයින්ගේ වැටුප් විශ්‍රාම වැටුප් සමෘද්ධි දීමනා හා වෙනත් එදිනෙදා පවත්වා ගෙන යාමේ වියදම්වලට ඇස්තමේන්තු කරලා තියෙනවා බිලියන 196ක්. බලාපොරොත්තු වෙන සියලුම ආදායම තියෙන්නේ බිලියන 173යි. එතකොට බිලියන 23ක් මාර්තු මාසයට පවත්වාගෙන යන්න මදි. ඒ අතර අර ගෙවිය යුතු බහු පාර්ශක ණය ගෙවන්න අවශ්‍යයි බිලියන 500කට වඩා වැඩි මුදලක්. ඉතින් මේ මාර්තු මාසයට 500 ගණනක් විතර අඩුයි මාස දෙකක වැටුප් ගෙවන්න සිදුවෙනවා අවුරුද්ද නිසා. ඒ කියන්නේ මාර්තු මාසයේ වැටුපයි, අප්‍රේල් මාසයේ වැටුපයි. මේ වැටුප් දෙක ගෙවාගැනීම සඳහා මේ ලැබුණ පළවෙනි වාරික මුදලින් කොටස් භාණ්ඩාගාරය පාවිව්චි කරන බව තමයි සඳහන් කරේ.”