ශ්‍රී ලංකා ක්‍රිකට් කණ්ඩායමේ සාමාජිකයන් හට කොරෝනා රෝග මර්ධනය සඳහා ලබාදෙන ඔක්ස්ෆර්ඩ් ඇස්ට්‍රා සෙනෙකා එන්නත ලබාදීම වහාම ක්‍රියාත්මක වන පරිදි අත්හිටුවා ඇති බව ශ්‍රී ලංකා ක්‍රිකට් පරිපාලන කමිටු සභාපති මහාචාර්ය අර්ජුන් ද සිල්වා පවසනවා.
මහාචාර්යවරයා පැවසුවේ ඔක්ස්ෆර්ඩ් ඇස්ට්‍රාසෙනෙකා එන්නත සම්බන්ධයෙන් බ්‍රිතාන්‍යය ගෙන ඇති තීරණය අනුව මෙලෙස ශ්‍රී ලංකා කණ්ඩායමේ ක්‍රීඩකයන් එන්නත්කරණය අත්හිටවූ බවයි.
බ්‍රිතාන්‍යය ඇස්ට්‍රාසෙනෙකා එන්නත වයස අවුරුදු 30 ට අඩු අයට ලබානොදෙන ලෙස පසුගියදා නිර්දේශ නිකුත් කළා.
ශ්‍රී ලංකා කණ්ඩායමේ ක්‍රීඩකයන් බහුතරයක් වයස අවුරුදු 30 ට අඩුවීම සහ ක්‍රීඩකයන් බොහෝදෙනෙක් ඇස්ට්‍රාසෙනෙකා එන්නත ලබාගැනීමට අකමැත්ත පළකිරීමත් මේ සඳහා හේතුවූ බව මහාචාර්ය අර්ජුන් ද සිල්වා මහතා වැඩිදුරටත් පවසා සිටියා.
මේ සමඟ ක්‍රීඩකයන්ට එළඹෙන බංගලාදේශ සංචාරයේදී සෞඛ්‍ය තර්ජනයක් මතුවේදැයි හිරු ප්‍රවෘත්ති කළ විමසීමකට පිළිතුරු දෙමින් මහාචාර්යවරයා කියා සිටියේ බංගලාදේශ කණ්ඩායමේ සියලු සාමාජිකයන් එන්නත්කරණයට ලක්ව ඇති බවත් මෙම සම්පූර්ණ සංචාරය ජීව බුබුලක් යටතේ ක්‍රියාත්මක වීමත් යන කාරණා ඔස්සේ එවැනි තර්ජනයක් ඇතිවීමට ඇති ඉඩකඩ සීමිත බවයි.