රණවිරු අනුස්මරණ උළෙල අද / රෑ 7ට පහනක් දල්වන්න

ජාතික රණවිරු සැමරුම් දිනයට සමගාමීව (මැයි 19 දින) රණවිරු අනුස්මරණ උළෙල අද පැවැත්වෙනවා.

ජනාධිපති මෛත්‍රිපාල සිරිසේන මහතාගේ ප්‍රධානත්වයෙන් ත්‍රිවිධ හමුදාව, පොලිසිය හා සිවිල් ආරක්ෂක බළකායේ ඉහළ නිලධාරීන්, රට වෙනුවෙන් දිවිපිදු සහ අතුරුදන්වූ ආරක්ෂක අංශ සාමාජිකයන්ගේ ළඟම ඥාතීන්ගේ සහභාගිත්වයෙන් බත්තරමුල්ල රණවිරු ස්මාරකය අභියසදී අද (19දා) දින සවස 3.30 ට මෙම සැමරුම් උත්සවය පැවැත්වීමට නියමිතයි.

එසේම, සාමයේ “දසවර්ෂාභිශේක” සැමරුම වස් සාමයේ පහන් දැල්වීම ද මෙවර රණවිරු සැමරුම වෙනුවෙන් සංවිධානය කර ඇති තවත් සුවිශේෂි අංගයක් වනවා.

මෙහිදි ත්‍රිවිධ හමුදාව පොලිසිය හා සිවිල් ආරක්‍ෂක බලකායේ ජීවිත පූජා කල විරෝධාර රණවිරුවන් සිහිකරමින් 2019 මැයි මස 19 වන දින සවස 0700 ට දීප ව්‍යාප්තව ආගමික ස්ථානයන්හි රජයේ/ පුද්ගලික ආයතන වල, සියළුම නිවෙස්වල, ත්‍රිවිධ හමුදා කඳවුරු / පොලිස් ස්ථාන තුල “සාමයේ පහනක්” දල්වා ඔවුන් අනුස්මරණය කිරීමට සැලසුම් කර තිඛෙනවා.

මෙවර රණවිරු සැමරුම් උළෙල තවත් සුවිශේෂි සැමරුම් අංගයක් ලෙස සාමයේ “දසවර්ෂාභිශේක” සැමරුම සනිටුහන් කිරීම සඳහා වෙල්ලිමුල්ලිවෛක්කාල් රණවිරු ස්මාරකය පිළිබිඹු වන පරිදි නිර්මාණය කරන ලද මුල් දින කවරය හා සමරු මුද්දරය 2019 මැයි මස 22 වන දින බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ දි එළිදැක්වීමට නියමිතයි.