පස්සර අනතුරට මුල්වූ හේතු සොයන්න කමිටුවක් / ගල් කුට්ටිය ඉවත් නොකිරීම ගැන චෝදනා

ලුණුගල පස්සර ප්‍රදේශයේ ඊයේ (20) සිදුවූ මාරක අනතුර සම්බන්ධයෙන් සොයා බැලීමට ත්‍රිපුද්ගල කමිටුවක් පත් කළ බව මහාමාර්ග අමාත්‍යාංශය නිවේදනය කර තිබෙනවා.

එහි ලේකම් R.W.R ප්‍රේමසිරි මහතා කියාසිටියේ මේවන විටත් 3 දෙනෙකුගෙන් සමන්විත එම කණ්ඩායම අනතුර සිදුවූ එම ප්‍රදේශයට ගොස් සොයා බලමින් සිටින බවයි.

මෙහිදී මාර්ග සංවර්ධනයේදී යම් අඩුපාඩුවක් හෝ අක්‍රමිකතාවක් සිදුවී ඇත්ද යන්න සොයා බලන අතර  මාර්ගයට කඩා වැටුණු ගල් පර්වතය මෙපමණ කලක් තිස්සේ ඉවත් නොකිරීමට හේතුව ද සොයා බලන බවයි ලේකම්වරයා කියාසිටියේ.

අනතුර සම්බන්ධයෙන් ත්‍රිපුද්ගල කමිටු වාර්තාවෙන් පසු, මරණයට පත්වූවන්ගේ ඥාතීන්ට සහ තුවාල ලැබූවන්ට වන්දි ගෙවීම සම්බන්ධයෙන් අවසන් තීරණය  ගන්නා බව ද  මහාමාර්ග අමාත්‍යංශ ලේකම්වරයා සදහන් කළා.

මේ අතර මෙම අනතුර සම්බන්ධයෙන් අදහස් දක්වමින් බදුල්ල දිස්ත්‍රික් පාර්ලිමේන්තු මන්ත්‍රී චාමර සම්පත් දසනායක කියාසිටියේ කඩාවැටී ඇති මෙම ගල් පර්වතය සම්බන්ධයෙන් අවස්ථා ගණනාවකදී පස්සර ලුණුගල ප්‍රාදේශීය සංවර්ධන කමිටුවේදී ප්‍රශ්න කර ඇති බවයි.

කෙසේවෙතත් ජීවිත 14කින් වන්දි ගෙවන තුරුත් එය නිවැරදි කර ගැනීමට නොහැකි වු බවයි ඔහු පෙන්වා දුන්නේ.

මෙම අනතුර සහ ඉන් සිදුවූ ජීවිත හානි පිළිබඳ ඍජු වගකීම පැවරෙන්නේ කාට ද යන්න සොයා බලා මින් ඉදිරියට එවැනි අනතුරු සිදු නොවීමට ගත යුතු උපරිම ක්‍රියාමාර්ග ගන්නා බව ද ඔහු සඳහන් කළා.

පුවත යවන්න

Leave a Reply

Your email address will not be published. Required fields are marked *