විරෝධතාකරුවන් පිරිසක් විසින් අත්පත් කර ගත් කොළඹ මල් පාරේ පිහිටි අග්‍රාමාත්‍ය කාර්යාලය වහාම බලධාරීන් වෙත ආපසු ලබා දෙන ලෙස ශ්‍රී ලංකා නීතිඥ සංගමය අවධාරණය කරයි.
එම සංගමය අවධාරණය කළේ, සාමකාමී විරෝධතාවලට ඇති අයිතිය ශ්‍රී ලංකා නීතිඥ සංගමය අඛණ්ඩව තහවුරු කරන අතරම ව්‍යවස්ථා විරෝධි වන අවනීතිය හෝ අරාජික තත්ත්වයකට සහය නොදක්වන බවයි.
රජයේ කාර්යාල අල්ලාගෙන විනාශ කිරීමට හෝ දේපොළවලට හානි කිරීමට උත්සාහ කිරීම සාමකාමී විරෝධතාවක් නොවන බව ශ්‍රී ලංකා නීතිඥ සංගමය පෙන්වා දෙයි.
ශ්‍රී ලංකා නීතිඥ සංගමය විරෝධතාවයේ නිරතව සිටින පිරිසගෙන් ඇතුළු ජනතාවගෙන් ඉල්ලා සිටින්නේ සංසුන්ව සිටින ලෙසත්, දේශපාලන නායකයින් පොරොන්දු වු බල සංක්‍රමණයට ඉඩ තබන ලෙසය.
ජනාධිපති ගෝඨාභය රාජපක්ෂ විසින් කතානායකවරයා සහ අග්‍රාමාත්‍යවරයාය දන්වා ඇති පරිදි අද දිනයේ ඔහුගේ ජනාධිපතිවරයාගේ ඉල්ලා අස්වීම පිළිබඳව නිවේදනය කිරීම මෙරට ජනතාව තුළ ඇති නීත්‍යානුකූල අපේක්ෂාවක් බව නීතිඥ සංගමය පෙන්වා දෙයි.
ජනාධිපතිවරයා රටෙන් පිටව යන බවට වාර්තා පළ වෙමින් තිබියදී ඉල්ලා අස්වීමේ ලිපිය හෝ නිශ්චිත වේලාවක් ජනතාවට දැනුම්දී නැත.
මහජන ආරක්ෂක ආඥා පනත යටතේ හදිසි නීතිය ප්‍රකාශයට පත් කිරීම හා බස්නාහිර පළාතට ඇඳිරි නීතිය පැනවීම පිළිබඳ වාර්තා පළ වූ බවත් ජනාධිපතිවරයා රට හැර ගොස් ඇති බැවින් ආණ්ඩුක්‍රම ව්‍යවස්ථාවේ 31 එක වගන්තිය යටතේ වැඩබලන ජනාධිපතිවරයා ලෙස අග්‍රාමාත්‍යවරයා පත් කල බව කතානායකවරයා දැනුම් දුන්නේ ය.
මෙම සන්නිවේදනයන් මහජනතාව අතර ව්‍යාකූලක්වයට හා අවිනිශ්චිතතාවය හේතුවී ඇතැයි ශ්‍රී ලංකා නීතිඥ සංගමය පෙන්වා දෙයි.
ඕනෑම පෞද්ගලික හෝ පොදු දේපොළකට සිදුවන ප්‍රචණ්ඩ ක්‍රියාවක් හෝ විනාශයක් ජනතාවට දුන් පොරොන්දුවලට පිටුපා සිටිමට නිදහසට කරුණක් ලෙස භාවිතා කළ හැකි බව ද ශ්‍රී ලංකා නීතිඥ සංගමය අවධාරණය කළේ ය.