උතුරු මුහුදට ඇතුල්වූ ඉන්දීය ධීවර යාත්‍රා සහ යාපනයේ ධීවරයින් අතර ඇති වූ ගැටුම්කාරී තත්වයක් හේතුවෙන් අද (01) දිනයේද යාපනයේ ස්ථාන කිහිපයක විසඳුම් ඉල්ලා විරෝධතාවන් සහ උපවාසයන් සිදුකිරීමට යාපනයේ ධීවරයින් පියවර ගෙන තිබෙනවා.
යාපනය වඩමාරච්චි සක්කොට්ටෙයි මුහුදු තීරයේදී ඊයේ (31) රාත්‍රියේ අනවසරයෙන් ඇතුල් වූ ඉන්දීය ධීවර ට්‍රෝලර් යාත්‍රා තුනක් වඩමාරච්චි ධීවරයින් විසින් කොටුකරගෙන සිටින අවස්ථාවේදී ඉන්ධීය ධීවරයින් විසින් පෙට්ට්‍රල් බෝම්බ ප්‍රහාරයක් එල්ල කිරීම හේතුවෙන් එක් ධීවරයෙකු තුවාල ලැබූ බව ද ධීවරයන් සදහන් කළා.
එමෙන්ම පේදුරුතුඩුව සුපර්මඩම් ප්‍රදේශයේ ධීවරයින්ගේ රුපියල් මිලියනයකට අධීක වටිනා දැල් ආම්පන්න ඉන්දීය ධීවරයින් විසින් ඊයේ (31) විනාශකොට පලා යාමට එරෙහිව එහි ධීවරයින් විසින් වැල්වැටිතුරෙයි පේදුරුතුඩුව මාර්ගයක් අවහිර කොට ධීවර ගැටලුවලට විසඳුම් ඉල්ලා අද දින උපවාසයක් ආරම්භ කර තිබෙනවා.
මේ අතර අච්චුවේලි පොලිස් වසමේද ධීවරයින් විසින් ඉන්දීය ධීවර ප්‍රහාරයන්ට එරෙහිව අච්චුවේලි ප්රධාන මාර්ගයක් අවහිර කරමින් අද (01) උදෑසන විරෝධතාවක් සංවිධානය කොට ඇති අතරම පලාලි පොලිස් වසමේ ඇන්ටනීපුරම් ප්‍රදේශයේද මාර්ගයන් අවහිර කරමින් අද දින විරෝධතාවන් සංවිධානය කර තිබෙනවා.
විරෝධතාවනහි නිරත යාපනයේ ධීවරයින් වැඩිදුරටත් පවසා සිටින්නේ උතුරු ධීවරයින් සහ ඉන්දීය ධීවර ගැටලුව වෙනුවෙන් ආණ්ඩුව කිසිදු පියවරක් නොගැනීම මත මේ වන විට උතුරු මුහුදු තීරයම දැඩි අවධානම් තත්වයක පසුවන අතර දෙරටේ ධීවරයින් දුටු තැන ගැටුම් ඇතිකර ගැනීමේ වාතාවරණයක් නිර්මාණයවී ඇති බවයි. – වන්නි රොමේෂ් මධුෂංඛ